માથાનો દુખાવો-કાનની તકલીફની સારવાર

ધીરુબહેન પટેલ

એક દિવસ(૨૦૧૨માં) શ્રી, માધવ રામાનુજનો ફોન આવ્યો કે આપણાં જાણીતા લેખિકા ધીરુબહેન પટેલને તમારી પાસે કુદરતી સા૨વા૨ માટે આવવું છે. મેં કહ્યું કે સાહેબ, આપ કહો ત્યારે એમના માટેનો યોગ્ય સમય ગોઠવી દઈએ. આ રીતે ૮૭ વર્ષના ધીરુબહેન આવ્યા.

બાળપણમાં એમના અનુવાદિત ટીમ સૉયરના પરાક્રમો ગાંધી આશ્રમની લાઈબ્રેરીમાં વાંચેલા. નિહાર આરોગ્ય મંદિર માંથી પાછા ઘેર જતી વખતે માથાના દુઃખાવાની તકલીફના ઈલાજનો એક સરસ પ્રસંગ કહ્યો; જે એમના શબ્દોમાં જ વાંચીએ….

ત્યારે મારી ઉંમર માંડ ૧૭ વર્ષની હશે. કોઈ કારણસર ગમે ત્યારે એવું સખત માથું દુ:ખે કે એની ગોળી લીધા પછીય જોઈએ એવી શાંતિ ન મળે. એ જમાનામાં દુઃખાવાને દબાવવા માટે ડોન લીધા કરતી. અન્ય કોઈ સા૨વા૨થી એ દુઃખાવો નહોતો મટતો. ક્યારેક તો બે ગોળી પણ ગળવી પડતી.

એ અરસામાં નેચરોપથીના ધુરંધર કહેવાય એવા ડૉ. લક્ષ્મણ શર્માનો મને ભેટો થઈ ગયો. મેં એમને મારા દુઃખાવાની વાત કરી. જવાબમાં એમણે કહ્યું કે આ તો સાવ સામાન્ય તકલીફ છે, મટી જશે.

મને મનમાં ને મનમાં હસવું પણ આવેલું. આટલા દિવસથી હું હેરાન થઈ રહી છું અને આ વ્યક્તિ કહે છે કે મટી જશે, કાંઈ વાંધો નહીં આવે….

છતાંય, ડૂબતી વ્યક્તિ જેમ તરણું પકડે એમ મેં કહ્યું કે સારું, મારે શું કરવું જોઈએ….?

એમણે સાવ સરળ, સામાન્ય અને સહજ લાગતો એક પ્રયોગ બતાવેલો. સવારે એક થાળી ભરીને બાફેલી ભાજી લેવાની. એમાં માણસે કાંઈ નહીં ઉમેરવાનું. કુદરતે જે ઉમેરીને આપેલું છે એમ જ એને ખાવાની…!

એની સાથે જાડા લોટમાંથી બનાવેલી થૂલાવાળી ભાખરી લેવાની. અને સાથે તાજું અડધું શ્રીફળ શાંતિથી ચાવીને ખાવાનું.
આપણું અવળચંડું મન તરત જ પ્રશ્ન કરશે કે સવાર સવારમાં થોડી આટલી બધી ભૂખ લાગે ? જે લોકોને સવારમાં ભૂખ ન લાગે એ સૌ બપોરના ભોજનમાં આ પ્રયોગ કરી શકે છે. આ જ ભોજન…!

મૂળ મારા પ્રયોગની વાત પર આવીએ. લગભગ સાત દિવસ સુધી મેં આ રીતે સવારના ભાજી, થૂલાવાળી ભાખરી અને શ્રીફળ લેવાનું રાખેલું.

સાત દિવસ પછી જાણે કે ચમત્કાર થયો…! મિત્રો, આ ચમત્કાર આજે ૭૦ વર્ષ વીત્યાં બાદ પણ ચાલુ જ છે. માત્ર સાત દિવસના પ્રયોગ પછી હજુ સુધી મને ક્યારેય માથાનો દુઃખાવો નથી થયો.

આ વાત પૂરી થઈ. માથાની વાત પતી અને કાનનો વારો આવ્યો…! એકવાર કાનમાં કોઈ કારણસર તકલીફ થયેલી અને એની સારવાર માટે એના નિષ્ણાત ડૉક્ટર પાસે ગયેલી. ડૉક્ટરે કાનમાં ઈજા પહોંચાડી અને પડદાને નુક્શાન કર્યું. સંભળાતું ઓછું થઈ ગયું.

મેં ડૉક્ટરને એમ કહેલું કે મને મારી ઘડિયાળ કાને રાખું તો એનો અવાજ નથી સંભળાતો. ડૉક્ટર જરાક ગરમ થઈને બોલેલા કે એમાં સમય દેખાય જ છે તો એને કાને શા માટે રાખો છો ….!!

એ અરસામાં મને પંડિત સીતારામ મળ્યા. એમને ખબર પડી કે મને કાનમાં તકલીફ છે એટલે ઈલાજની વાત કરી. મને હસવું આવ્યું. તમે કાનનો ઈલાજ બતાવશો…?

હા, હું કાનનો અકસીર ઈલાજ બતાવીશ. તમને મટી જશે.

જાત્યાદિ તેલને જરાક ગરમ કરી એના નવશેકા ટીપા ચારથી પાંચ જેટલા કાનની અંદર સાચવીને પાડવાના….

અહીં પણ ચમત્કાર થયો. માત્ર ૨૦ દિવસની આવી ટીપા-સારવાર પછી મને ફરીથી સંભળાવા લાગ્યું. ટીપે ટીપે કાનનું કાણું તો ભરાઈ જ ગયું….

“નિષ્ણાતની સલાહ વિના પ્રયોગ ન કરવો"