શરીરમાં, મનમાં રહેલી ખટાશ સાંધાનો દુઃખાવો, ફરતો વા વગેરેમાં તકલીફ કરી શકે છે..!

કોઈનાં વર્તનથી થયેલું ઊંડું દુઃખ સામેની વ્યક્તિ માટે મનમાં ખટાશ લાવી શકે છે. આહારમાં લેવાતી ખટાશ માફક ન આવે ત્યારે એનાંથી ચામડીમાં ખંજવાળ, એસિડિટી અને સાંધાનો દુઃખાવો પણ થઈ શકે છે. મનમાં ટેન્શન કે કોઈનાં માટે ખટાશ પેદા થાય ત્યારે પણ એસિડિટી તેમજ ફરતો વા થઈ શકે છે.

ફરતો વા (rheumatoid arthritis) માં લોહીમાં રહેલાં સારા સેલ્સ(કોષો) પણ નાશ પામે છે. ખરાબ કોષો નાશ પામે એ તો સારી વાત છે, જેને લીધે આપણે સાજા રહી શકીએ છીએ, પરંતુ કોઈ અજ્ઞાત કારણોસર ફરતાં વાની તકલીફમાં લોહીમાં રહેલાં સારા કોષો પણ નાશ પામે છે. રૂમેટોઈડ ફેક્ટરને કારણે આ કોષો નાશ પામે છે. આ લેખમાં આ ફેક્ટર માટે જવાબદાર સંભવિત એવા થોડાંક કારણો તેમજ સરળ સારવાર બતાવી છે.

દર્દીઓ સાથેનાં અનુભવ અનુસાર ફરતાં વાની તકલીફવાળાં ઘણાં કિસ્સાઓમાં અમે આવા દર્દીઓનાં સ્વભાવમાં બંધાયેલી દુઃખની ગાંઠનો અનુભવ કર્યો છે. કેટલાંક કિસ્સાઓમાં દર્દીનો પોતાનો સ્વભાવ પણ રોગને ટકાવી રાખવામાં કે આગળ વધારવામાં જવાબદાર બની શકે છે.

દહીંથી શરૂ કરીને લીંબુ સુધીની બધી જ ખટાશ, આથાવાળો આહાર, મગ તેમજ મગની દાળ સિવાયનાં બધાં જ કઠોળ અને ઘઉંને બંધ કરવાથી આહારનાં સંયમથી મળતો મોટો લાભ આ રોગનાં દર્દીઓને મળી શકે છે. ''યં'' ના મંત્રનો મંત્રોચ્ચાર સવારે બ્રશ કરીને અને ફરીથી રાત્રે સૂતી વખતે 5 થી 10 મિનિટ માટે કરવાથી મૂલાધાર ચક્રની શુદ્ધિ થવાથી મનની ખટાશ ઘટી શકે છે. મનોમન જ કોઈની માફી માગી લેવાથી, કોઈને માફ કરવાથી પણ રૂમેટોઈડ ફેક્ટર ઘટી શકે છે.

ગાજરનો જ્યૂસ, મોસંબીનો જ્યૂસ અને માફક આવે તો સલાડ લેવાથી લોહીની શુદ્ધિ થાય છે, લોહીનો વા ઘટવા લાગે છે. ગળોનો પાવડર, ગળોની ગોળીઓનો ચિકિત્સકની સલાહ અનુસારનો ઉપયોગ આ રોગમાં સારો લાભ આપી શકે છે. શરીરની સ્થિતિ અને શક્તિ મુજબ ચાલવાનો વ્યાયામ દિવસમાં ગમે ત્યારે 5થી 10 મિનિટ માટે કરી શકાય છે.

-મુકેશ પટેલ, મેનેજિંગ ટ્રસ્ટી,
નિહાર ચેરિટેબલ ટ્ર્સ્ટ,
અમદાવાદ.382480